Eigin sök og almennur veikindaréttur

Sök starfsmanns, ásetningur eða stórkostlegt gáleysi geta þó orðið til þess að veikindaréttur glatast. Þótt ekki sé kveðið á um þetta í lögum nr. 19/1979 er í athugasemdum við 5. gr. laganna sagt að allar greiðslur skuli atvinnurekandi inna af hendi þótt veikindi séu óviðkomandi þeirri vinnu, sem launþeginn stundar svo fremi að ekki sé til að dreifa ásetningi eða gáleysi launþegans sjálfs. Þar sem þetta eru ummæli í athugasemdum en ekki lagatextinn sjálfur ber einungis að hafa þetta til hliðsjónar við skýringar á honum. Þó má segja, að með eigin athöfnum geti starfsmaður glatað veikindarétti, svo sem ef hann framkallar veikindin (ásetningur) til þess eins að koma sér hjá vinnu og þiggja þess í stað laun í forföllum. Einnig er mögulegt að hann  geti með stórfelldu og ámælisverðu gáleysi sínu glatað rétti sínum eins og dómstólar hafa túlkað þetta ákvæði.